Дзесяты нумар часопіса “Маладосць”

“Прысвячэнне – Яўгеніі Янішчыц, прыгоды – дэтэктыўна-архіўныя, пра буквар і каханне – on-line; споведзь – ад езуіта,” – таямніча абвяшчае вокладка кастрычніцкай “Маладосці”, другога, берасцейска-люблінскага, тома праекта “Планета Палессе”. Каб разгадаць таямніцу, спярша вам, любыя чытачы, давядзецца пагартаць “Берасцейскі сшытак”, у якім старанна занатаваныя творы паэтаў і пісьменнікаў з Берасцейшчыны Наталлі Бінкевіч, Алены Папко, Марыі Стральчэні, Кацярыны Мядзведзевай, Яўгеніі Пракапчук, Таццяны Дземідовіч, Сяргея Белаяра ды Уладзіміра Сітухі, а таксама размовы з цікавымі асобамі, што з той жа Берасцейшчыны паходзяць: з першым беларускім езуітам новага часу Віктарам Жуком ды пісьменнікам Валерыем Гапеевым. Пасля вашым розумам і пачуццямі авалодаюць нашыя браты-палякі, ураджэнцы Любліншчыны ды ваколіц Бяла-Падляскі, сярод якіх таксама ёсць палешукі. Пачытайце іхнія творы ў перакладзе на беларускую. Даследуйце разам з “Маладосцю” глыбіню і шматграннасць таямнічай паляшуцкай душы!